Skatteforsk ved NMBU får 40 millionar kroner til å leie eit banebrytande prosjekt som skal avsløre skatteunndraging og utvikle smartare og meir rettferdige reglar.
Prosjektet blir gjennomført i tett samarbeid med Universitetet i Stavanger og kombinerer stordata, juridisk ekspertise og feltforsøk i verkelege situasjonar.
Målet er å avsløre triksa som kostar samfunnet milliardar, og gje styresmaktene verktøy for betre handheving og enklare reglar. Prosjektet har ei særleg satsing på å styrkje unge forskarar.
Ei solid anerkjenning
Rektor Solve Sæbø meiner tildelinga er eit viktig signal om kor relevant forskinga ved NMBU er:
— Vi er svært stolte over at Skatteforsk ved NMBU har fått denne viktige tildelinga frå Forskningsrådets program for toppforskning. Dette er ei sterk anerkjenning av arbeidet deira med å byggje bru mellom forsking og politikk, og bidra til faktabasert offentleg debatt om skatt, ulikskap og samfunnsutvikling. Gratulerer til Annette Alstadsæter og heile teamet! De set NMBU på kartet som eit leiande miljø innan økonomisk og samfunnsrelevant forsking, seier han.
Leiande forskarar med store ambisjonar
Bak initiativet står Annette Alstadsæter, leiar for Skatteforsk ved NMBU, i samarbeid med Benn Folkvord, professor i skatterett ved Universitetet i Stavanger.
Tildelinga gjer det mogleg å satse på forsking som ikkje berre er teoretisk, men som blir utvikla i dialog med brukarar og politikkutformarar. Det nye miljøet får stor vekt på formidling og skal bidra til ein meir kunnskapsbasert offentleg debatt.
Annette Alstadsæter trekkjer fram korleis tildelinga støttar opp om framtidas forskarar:
— Denne tildelinga gjev oss høve til å byggje vidare på forskinga vår og skape eit endå sterkare og langsiktig miljø for kvalitetsforsking. Eg er særleg stolt av at vi gjennom tildelinga kan satse meir på yngre forskarar. Slik kan vi byggje kunnskap som varer og oppnå langsiktige forbetringar i samfunnet.
Benn Folkvord seier at betre kunnskap om samspelet mellom økonomi og juss kan hindre sløsing:
— Vi kan ikkje sjå jussen og lovverket isolert frå økonomien og den røyndomen vi lever i. Vi ønskjer å avdekkje dei utilsikta konsekvensane av skattereglane, korleis nokon prøver å unngå dei, og korleis reglar og forvaltning kan betrast. Eit betre skattesystem vil kunne redusere sløsing og ineffektiv bruk av ressursar, seier han.
Fakta om Skatteforsk:
Skatteforsk er eit forskingssenter ved NMBU som studerer skatt, ulikhet og økonomisk åtferd. Senteret har internasjonal tyngde og samarbeider med forskarar og styresmakter over heile verda. Målet er å bidra til kunnskapsbasert politikk og offentleg debatt om skatt og samfunnsutvikling.