Doktorgradsarbeidet til Åse R. Grendstad viser korleis betre råvarer, smart prosessering og innsikt i forbrukarane kan forlenge haldbarheita til fermenterte meieriprodukt. Slik kan vi bidra til mindre matsvinn i både hushald og industri.
Her svarar ho på fire spørsmål om forskinga si:
Kvifor er denne forskinga viktig?
Det er viktig å forske på dette området fordi ein stor del av verdas befolkning framleis er underernært eller manglar stabil tilgang på nok mat, samstundes som enorme mengder mat går til spille kvart år. I Noreg står både hushald og matindustri for ein betydeleg del av matsvinnet.
Forsking er difor avgjerande for å utvikle tiltak som kan redusere svinn gjennom betre utnytting av råvarer, meir effektiv produksjon og produkt med lengre haldbarheit. Dette er sentralt for å nå FNs berekraftsmål og for å sikre berekraftige matsystem i framtida.
Kva var målet med doktorgradsarbeidet ditt?
Målet med avhandlinga var å oppnå ei djupare forståing av korleis råvarer, prosessparametrar og forbrukarinnsikt kan brukast for å forlenge haldbarheita til fermenterte meieriprodukt og redusere matsvinn. Det overordna målet var å identifisere strategiar som kan bidra til mindre svinn både hos forbrukarar og i industrien, gjennom optimalisert produktkvalitet og forlenga haldbarheit.
Kva er dei viktigaste resultata dine?
Funn frå forskinga viser at ein todelt tilnærming – der forbrukarinnsikt blir kombinert med produktoptimalisering – er nødvendig for å redusere matsvinn. Resultata peikar på fleire tilrådde tiltak:
- Gi forbrukarar kunnskap utover datomerking, med tydelege og produktspesifikke råd om sensorisk vurdering og matsikkerheit, slik at dei kan ta gode val også etter utgått dato.
- Optimalisere prosessparametrar: Mekanisk etterbehandling etter syrning og justeringar i fermenteringstemperatur kan bidra til lengre haldbarheit i fermenterte meieriprodukt.
- Forbetre råvarekvaliteten, særleg gjennom betre logistikk av mjølka og hygiene, for å sikre jamn og stabil produktkvalitet.
- Vurdere datomerking på nytt, basert på presise og kunnskapsbaserte vurderingar som unngår unødvendig korte haldbarheitsdatoar.
Kva betydning kan forskingsarbeidet ditt få for fagområdet og i ein større samanheng?
Forskingsarbeidet viser at matsvinn kan reduserast ved å forlenge haldbarheita til fermenterte meieriprodukt gjennom betre råvarekvalitet, optimal prosessering og meir presise metodar for å fastsetje haldbarheit. Arbeidet gir ny kunnskap som kan styrkje produktkvaliteten i industrien og føre til mindre svinn.
Det viser også at forbrukarane sine haldningar påverkar kor mykje mat som blir kasta, og understrekar betydninga av tydelege, produktspesifikke råd som kan styrkje vurderingsevna deira. Sensorisk kvalitetskontroll og mikrostrukturanalyse blir framheva som nyttige verktøy i kvalitetskontroll og haldbarheitstesting. I eit større perspektiv kan forskinga bidra til å nå nasjonale og internasjonale mål om redusert matsvinn og betre ressursutnytting.
FAKTA:
Åse Riseng Grendstad
- Tidlegare utdanning: Master i matvitskap, NMBU
- Frå: Oslo, Noreg
- Doktorgrad: Fullført ved NMBUs Fakultet for kjemi, bioteknologi og matvitskap
- Hovudrettleiar: Paula Varela- Tomasco
- Medrettleiarar: Davide Porcellato, Ingunn Berget og Hilde Kraggerud
- Tittel på avhandlinga:
- Norsk: Reduksjon av matsvinn: Forbedring av holdbarhet og sensorisk kvalitet på fermenterte meieriprodukter gjennom produktoptimalisering og forbrukerinnsikt
- Engelsk: Reducing food waste: Improving shelf life and sensory quality of fermented dairy products by product optimization and consumer insights