Patentboksar i ugrei skattekonkurranse

Av Annette Alstadsæter

Forskning og utvikling
Forskning og utviklingFoto: Shutterstock

Patentboksar innan EU truar norsk FoU-støtte og legg til rette for utholing av det norske skattegrunnlaget.

Innovasjon er ein viktig faktor for økonomisk vekst. Land bruker i hovedsak to ulike tilnærmingar for å stimulere til entreprenørskap og innovasjon, nemlig subsidier av forsking og utvikling (FoU) og patentboksar. Ein patentboks er ei spesialordning som gir skattefordelar til selskapsinntekter frå immaterielle rettigheter, som t.d. patentar, copyrigths og varemerke. Patenboksar gjer at fleire EU-land kan fungere som tilnærma skatteparadis for somme typer selskapsinntekter.

Immaterielle rettigheter er svært mobile, og innføring av patentboksar blir motivert ut frå å både ville behalde eksisterande immaterielle rettigheter i landet og å tiltrekke seg kunnskapsintensive bedrifter og stimulere til FoU.

Mange land i EU har nå ulike typar patentboksar som varierer både i omfang og innretning. Generelt er skattenivået innan patentboksane langt under det norske bedriftsskattenivået. Innføringa av ein patentboks kan føre til store tap i skatteproveny for eit land, då også inntekt frå eksisterande immaterielle rettigheter i landet nyt godt av redusert skattesats.

Ein forskningsartikkel av forskarar ved Skatteforsk og EU-kommisjonen som nylig blei publisert i Economic Policy viser at multinasjonale selskap flyttar immaterielle rettigheter og registrere dei i land med patentboksar. Dette gjeld særlig dersom dei immaterielle rettighetene har stort inntektspotensiale. Det ser ut som om at selskapa ikkje flyttar sjølve FoU-aktiviteten, men at det er resultatet av slik aktivitet i andre land som blir flytta inn i patentboksen, nemlig den immaterielle rettigheten. Det kan då tyde på at patentboksane fungerer som reine skatteplanleggingsverktøy heller enn å stimulere til auka FoU-aktivitet i landet.

Enkelte land har ein utviklingsbetingelse for sine patentboksar. Dei krever då at den immaterielle rettigheten til ein stor del er utvikla i landet for at inntekta skal kunne skattleggast innan patentboksen. Forskinga viser at slike utviklingsbetingelsar aukar sannsynet for at ein patentboks kan føre til auka FoU og dermed også auka realaktivitet i landet.

OECD ser ut til å akseptere bruk av patentboksar, gitt at dei har ein betingelse om at den immaterielle rettigheten må ha vore utvikla i heimlandet for at inntekta kan skattleggast innan patentboksen. Denne betingelsen er mindre avgrensande enn ein skulle tru, då ein innan EU i praksis kun kan legge som restriksjon at den immaterielle rettigheten er utvikla innan EU/EØS. Dermed er det framleis rom for skattekonkurranse om inntekt frå mobile immaterielle rettigheter mellom europeiske land.

I verste fall kan ein oppleve at Norge bruker betydelege offentlige middel på å støtte FoU i norske selskap, men at dei immaterielle rettighetene som kjem ut av dette blir overførte til andre lands patentboksar. I neste instans kan då desse i realiteten norskutvikla immaterielle rettighetane bli brukte som ledd i å flytte overskudd ut av landet ved at det norske selskapet betaler royalty for bruk av denne immaterielle rettigheten som nå er eigd i ein utanlandsk patentboks. Dette vil då redusere det norske skatteprovenyet frå selskapsskatten.

Denne teksten bygger på ein tidligare kronikk som blei publisert i DN laurdag 3.oktober 2015.

Publisert - Oppdatert

Del på